Rev 12 | WSK | STEP | Se kausa biya bo kigilik ta nunguningkiri taiti te aratam, mu imet bo, nu worem ko guang ko iwita kataram, se sige mu doleng bowa ningi anikaso, se ko supuling te mu baras 12.

Revelation of John 12

Imet bo nu worem guang ko iwita kataram mu se, dragon ko den

1 Se kausa biya bo ^{▼▼Rev 12:1-15:1 Chapter 12 nama 15 mu ningi John mel 7 kigilik ta nunguningkiri arigam wore ko den.} kigilik ta nunguningkiri taiti te aratam, mu imet bo, nu worem ko guang ko iwita kataram, se sige mu doleng bowa ningi anikaso, se ko supuling te mu baras 12. ^{▼▼Rev 12:1 “Imet” maso mu Kaem ko kariimet Israel nunga atumukereso ale ko den balso agila, mu awuk, Jesus mu Abraham, Isaac, se Jacob wore nunga gue te nu aratam (v5): Gen 37:9; 49:10. Imet imitang ko kuriang sang karogo tala (v17), umutang kariimet Jesus ko nongomang ningi nunguning.} 2 Nu kuriang iluwokko tom aram, se ko yaman moakaso se niakaso.

3 Se aking kausa bo tala taiti te aratam se arigem, mu dragon biya bo diriyam, ko supuling mu 7, se ko dinak 10. Se ko supuling suen la mu te mu crown anikasan. 4 Se dragon mu ko mom umu te baras suen biya (1/3) nunga sarumu waram se aliti kapa gilingiman. Dragon imi mu imet kuriang iluwokko negawaram mu koma dugu te sanamaram, ale imet mu kuriang iluwok se naukko kimi bitawaram.

5 Se imet mu kuriang kari iluwam, se kuriang umu king, nu sikir ain mu iluwok ale te ali sor suen la ko kariimet nunga bituokko. ^{▼▼Rev 12:5 Jesus ali sor suen la ko kariimet nunga bituokko: Psalm 2:9; Rev 19:15.} Se dragon kuriang mu naukko negeram, bare Kaem balam se tairate kuriang mu taman ale ilak tarigi nama Kaem ko daiga kuwim biya te bagaram mu kote beteman. 6 Se imet mu naguram nama kuwim bo kariimet mena, Kaem nunguru beteram se aniram mu te nama aratam. Se mu te nuna nu ko sinar tamon ilak nama tom 1260 ko.

7 Se duruk wonong te kager biya barasam. Michael ^{▼▼Rev 12:7 Engel Michael: Dan 10:13,21; 12:1; Jude 9.} ko engel arungu nuna dragon momonko se ilak kagerakasan. Se aking dragon ko engel arungu barasaman ale koma ko arungak kagerakasan. 8 Bare dragon ko engel arungu mu nosokelel mena, se duruk wonong te bagomonko me terong. 9 Se Kaem ko engel alo mu dragon mu iluman ale ali imi te sapaman se tai dagulam. Nu girakala ko ma aromemek, nuna balsan Satan masan, Devil masan, borta. Nu aliti kariimet suen la nunga kulokko kari. Bare nuna iluman ali imi te sapaman se tai dagulam, se ko engel karogo la nunga gi warman se ilak tai dagulaman. ^{▼▼Rev 12:8-10 Satan mu ma iwita: Gen 3:1. Noko nup Satan mu ko nunguning mu nu kariimet ikup den ningi nunga awuso: Job 1:11; Zech 3:1. Jesus noko iwita balam: Luke 10:18; John 8:44; 12:31.}

10 Se duruk wonong te ani kuring bo biyala balam se ikiem:

“Aitak Kaem ko kingdom tai aratam!
Nu ko sokel wetang te beteram ale ko kariimet nunga sangaru tam!
Se noko kari Kristus nup biya se sokel biya tam!
Mu awuk, kari Satan, nu turom woremkalal Kaem koma dugu te sanamoso ale anananga sikisaki den ningi nunga awuso,
mu engel alo nu iluman, ale aliti sapaman se nama dagulam!
11 Anananga sikisaki mu Sipsip Gotek ko gue te sail taman,
ale ko den balman,
ale munan umutang te nuna Satan ko sokel kia gilingiman.
Nuna kuemonko me nguangakasan,
am nanga momon se kuenakko makasan.
12 Buta se duruk wonong, amilmilerko!
Se nina arikaya mu te anisan, mu amilmilaralko!
Bare ali se gagi, mu nina sinar talko!
Ikup ninguru ninga irokkowo!
Mu awuk, Satan nenengate nama kaparam, ale nu gomang ninguru magoso,
mu awuk, nu ikiso, ko tom katirta.”
13 Se dragon mu numi ikiam nu aliti sapaman se dagulam, se nu imet kuriang kari iluwam mu morukko kowom karokaso. 14 Bare nuna luman ilagala, taraga biya bo ko luman iwita, mu imet mu tuman, nu te bungiok ale dragon bitiruk ale noko kuwim kariimet mena mu te namuruk ale nu ko awar biya bagurukko. Se mu te nuna yar ilagala suwan se bo ko komasang ago (3 1/2 yar) nu ko sinar tamonko. 15 Se dragon mu ko kuring te yu lom biyala kapikaso se kapakaso, imet owore te tagirok se kuerukko kapikaso. 16 Bare ali tuagu mu imet mu saongam ale kuring wuseluwuram se yu lom dragon ko kuring te aratam namakaso mu no lakumukaso. 17 Se dragon mu nu imet umu ko gomang maga kaparam, se ko kuriang saki, nuna Kaem ko kuring karo tusan, ale Jesus kowom karo se ko dugu duap kariimet nunga manorsan, wore arungak kagerurukko namaram.

Buta se dragon mu nu langi, gagi norogen te sanamiwakaso.

18